Azərbaycanda əhalinin banklardakı əmanətlərində son 3 ilin ən aşağı artım tempi qeydə alınıb
Mərkəzi Bankın məlumatına görə, 01 mart 2014-cü il tarixinə əhalinin banklardakı əmanətlərinin həcmi 6 milyard 591 milyon 700 min manat təşkil edib.
İlin əvvəlindən ötən iki ay ərzində əhalinin əmanətləri 195,9 milyon manat, ötən ilin martından ötən müddət ərzində isə 1 milyard 78 milyon 300 min manat artıb.
Diqqət çəkən trend budur ki, əhalinin əmanətlərinin artım tempi aşağı düşüb. Belə ki, 2013-cü ilin yanvar – fevral ayları ərzində əhalinin əmanətləri 303,5 milyon manat artdığı halda, cari ilin anoloji dövründə 195,9 milyon manat artıb, yəni 107,5 milyon manat və ya 35% aşağı düşüb. 2012-ci yanvar-fevral aylarında əhalinin əmanətlərinin artımı isə 211 milyon manat təşkil etmişdi.
Mütəxəssislər, əhalinin banklara daha az əmanət qoymağa başlamasına, 1 avqust 2013-cü il tarixindən Əmanətlərin Sığortalanması Fondunun qorunan əmanətlər üzrə illik faiz dərəcəsinin yuxarı həddini 12%-dən 10%-ə endirməsinin səbəb olduğunu söyləyirlər.
