“Kredit faizlərinin aşağı salınmasına əmanət faizlərinin aşağı salınması daha çox imkan yaradar”.
Bunu “Marja”ya “AccessBank”nın İdarə Heyətinin sədr müavini Şakir Rəhimov bildirib.
O, qeyd edib ki, “AccessBank” kredit faizlərini ildən-ilə cəlb edilən vəsaitlər hesabına az da olsa aşağı salmağa çalışır, lakin buna əmanət faizlərinin aşağı salınması daha çox imkan yaradardı:
“AccessBank”ın kredit portfelinin böyük bir hissəsi depozit portfeli ilə bağlıdır. Buna görə, kreditlərin faiz dərəcələri əmanət faizlərindən də asılıdır. Nə qədər əmanət fizləri aşağı düşsə, biz də kredit faizlərini bir o qədər aşağı sala bilərik”.
Şakir Rəhimov qeyd edib ki, sonuncu dəfə “AccessBank” QSC-nin “Raiffeisen Bank İnternational AG” vasitəsilə cəlb etdiyi 60 milyon ABŞ dolları sindikatlaşdırılmış kredit də verilən kreditlərin faiz dərəcələrinin cüzi də olsa aşağı salınmasını imkan verəcəkdir:
“Bəli, biz kredit faizlərini endirməyi fikirləşirik. Ümumiyyətlə, “AccessBank” faiz dərəcələrinə daim baxır. Biz ötən 2-3 ilə baxsaq görərik ki, hər il faiz dərəcələri aşağı düşür. Məsələn, keçən illə müqayisədə faiz dərəcələri 3-4% aşağı düşüb”.
Qeyd edək ki, Əmanətlərin Sığortalanması Fondunun qorunan əmanətlər üzrə illik faiz dərəcəsinin yuxarı həddi 10% təşkil edir.