Biz hər zaman bankımız qarşısında öhdəliklərini yerinə yetirmək istəyən, amma müəyyən çətinliklər çəkən bu müştərilərlə gecikən borcların tənzimlənməsi istiqamətində müzakirələr aparmağa, problemin həllinə dəstək olmağa hazırıq. Qeyd edək ki, bankın bu istiqamətə yönəlmiş proqramı uğurla həyata keçirilir və çətinliklərlə üzləşən müştərilərimizin əksəriyyəti öz kreditlərini bu proqramlar çərçivəsində restruktruzasiya edirlər.

Eyni zamanda böyük narahatlıqla qeyd etmək istəyirik ki, son zamanlarda qondarma “antikollektor” adı altında aktivləşən bəzi mənfəətpərəstlər kredit ödənişində çətinliklər çəkən bəzi müştəriləri və ödənişlərdən məqsədli şəkildə boyun qaçıran bir sıra müştəriləri yanlış yola yönləndirirlər.

Öz bank təcrübələrinə əsaslanaraq vəkil rolu oynayan, sosial şəbəkələrdə propaqandalar apararaq müəyyən ödəniş qarşılığında müştərilərə “bankı aldatmağın” yollarını öyrədəcəklərinə və öhdəliklərindən necə yayınmaqda kömək edəcəklərinə söz verirlər. Bu isə təbii ki, sonda onlara inanan müştərilər üçün pis nəticələrə gətirib çıxarır.

Bank qarşısında öhdəliklərindən yayınmaq AR qanunvericiliyinə görə müəyyən hüquqi məsuliyyətlərin yaranmasına səbəb olur ki, sonda cəzanın bütün ağırlığı bu müştərinin üzərinə düşür və onu daha da çətin vəziyyətə salır.

Banklara, kreditorlara qarşı sosial şəbəkələrdə çirkli PR apararaq, aldadıb pulunu aldıqları borcluların qarşısında özlərini təmizə çıxarmağa çalışan bu möhtəkirlər isə sonda sudan quru çıxırlar.

Unibank öz müştərilərinə bu vasitəçi fırıldaqçıların vədlərinə uymamağa, bütün məslələri birbaşa bankla qarşılıqlı anlaşma yolu ilə həll etməyə çağırır.

Öz tərəfimizdən biz bir daha bəyan etmək istəyirik ki, bank olaraq özlərini “antikollektor” adlandıranlarla hüquqi çərçivədə bütün mümkün yollarla mübarizə apararaq, öz müştərilərimizi onların çirkin əməllərinin yaradacağı nəticələrdən qoruyacağıq.