2014-cü ilin ilk rübündə Azərbaycanın 28 sığorta şirkəti tərəfindən 117,94 milyon manat sığorta haqları hesablanmışdır.

“Marja” Dövlət Sığorta Nəzarəti Xidmətinin hesabatına istinadən xəbər verir ki, hesablanmış sığorta haqları ötən ilin anoloji dövrü ilə müqayisədə 15,74 milyon manat və ya 15,4% çoxdur.

Birinci rübdə sığorta şirkətlərinin ödənişləri 25,4 milyon manat təşkil etmişdir, bu da ötən ilin birinci rübü ilə müqayisədə 3,16 milyon manat və ya 12,4% çoxdur.

İCBARİ SIĞORTALAR 10 FAİZDƏN AZ ARTIB

Yanvar-mart ayları ərzində könüllü sığortalar üzrə 87,14 milyon manat, icbari sığortalar üzrə isə 30,8 milyon manat sığorta haqları hesablanmışdır. Ötən ilin eyni dövrü ilə müqayisədə könüllü sığortalar üzrə hesablanmış  sığorta haqları 13,1 milyon manat və ya 17,7% , icbari sığortalar üzrə isə 2,62 milyon manat və ya 9,3% artmışdır.

BAZARDA ARTIMI KÖNÜLLÜ HƏYAT SIĞORTASI VƏ TİBBİ SIĞORTA TƏMİN EDİB

Sığorta bazarında artım əsasən könüllü həyat və tibbi sığortanın hesabına baş vermişdir. Birinci rübdə könüllü həyat sığortası üzrə hesablanmış sığorta haqları 20,8 milyon manat təşkil etmişdir ki, bu da ötən ilin eyni dövrü ilə müqayisədə 8,7 milyon manat və ya 72% çoxdur. Tibbi sığorta üzrə hesablanmış sığorta haqları isə müqayisə olunan dövürdə 4,2 milyon manat və ya 13,3% artmışdır.

KASKO SIĞORTA  25 FAİZDƏN ÇOX AZALIB

2013-cü ilin ilk rübündə Azərbaycanın sığorta şirkətləri avtonəqliyyat vasitələrinin sığortası üzrə 8,18 milyon manat sığorta haqları toplayıblar. Bu da 2013-cü ilin birinci rübü ilə müqayisədə 25.2% azdır. Halbuki, sığorta şirkətləri ötən ilin ilk rübü avtonəqliyyat vasitələrinin sığortası üzrə 10,94 milyon manat sığorta haqqı toplamışdılar.

“PAŞA SIĞORTA” LİDER OLARAQ QALIR

Birinci übdə ən çox sığorta haqlarını 27,42 milyon manat olmaqla “PAŞA Sığorta” şirkəti hesablamışdır. Sonrakı yerlərdə “Atəşgah Həyat” (15,05 milyon manat), “PAŞA Həyat Sığorta” (9,09 milyon manat), Azsığorta (8,75 milyon manat) və Dövlət Sığorta Kommersiya Şirkəti (8,04 milyon manat) gəlmişdir.