Son 12 ayda “Rabitəbank” ASC-nin verdiyi kreditlər artmasa da, Bankda ödəmə vaxtı keçmiş kreditlər artıb.

31 Mart 2016-cı il tarixinə bankda ödəmə vaxtı keçmiş kreditlərin məbləği 12 milyon 718  min manat təşkil edib. Bu məbləğ, bankın eyni tarixə 208 milyon 967 min manat olmuş kredit portfelinin 6,1%-nə bərabərdir.

Müqayisə üçün qeyd edək ki, ötən ilin eyni dövründə (31.03.2015) “Rabitəbank”ın 231 milyon 644 min manatlıq kredit portfelinin 11 milyon 114 min manatının və ya 4,8%-nin ödəmə vaxtı keçmişdi.

Müqayisə olunan dövrdə, Bankın kredit portfeli 9,8% azaldığı halda, problemli kreditlər 14,4% artıb.

Vaxtı Keçmiş Kreditlərin məbləği və kredit portfelində xüsusi çəkisi, min manat

GƏLİRLƏRİ AZALIB, XALİS MƏNFƏƏTİ CÜZİ OLUB

Qeyd edək ki, “Rabitəbank” ASC 2016-cı ilin 1-ci rübünü 12 min manat xalis mənfəət ilə başa vurub. Birinci rübdə bankın cəmi gəlirləri 11 milyon 142 min manat təşkil edib (Ötən ilin eyni dövründə 14 milyon 542 min manat olmuşdu, azalma 23,4%).

Bank əməliyyat mənfəətinin 2  milyon 675 min manatını ehtiyatların yaradılmasına ayırdığından xalis mənfəət cüzi olub.

Ötən ilin ilk rübü ilə müqayisədə “Rabitəbank”ın faiz gəlirləri 13,6%, qeyrifaiz gəlirləri isə 54,7% azalıb.

Mənfəət və zərər hesabatı (min manatla)

 KAPİTALI AZALIB

Ötən ilin Mart ayının sonundan bu ilin Mart ayının sonuna qədər olan dövrdə, “Rabitəbank”ın aktivləri 105 milyon 836 min manat və ya 32,8% artaraq 428 milyon 161 min manata çatıb. Aktivlərin artmasının əsas səbəbi Bankda likvid aktivlərin 2,6 dəfə artaraq 172 milyon 855 min manata yüksəlməsidir. Eyni dövrdə Bankın cəmi kapitalı 1 milyon 530 min manat azalaraq 58 milyon 37 min manata düşüb.

BALANS (min manatla)