1469691976_4

Ərəb turistlər qış aylarında da Azərbaycanı seçəcəklər

“Azərbaycana ərəb turistlər daha çox İraqdan gəlir”.
Bunu Azərbaycan Turizm Assosiasiyasının (AzTA) sədrinin müşaviri Müzəffər Ağakərimov deyib.
Onun sözlərinə görə, Azərbaycana ərəb ölkələri arasında daha çox İraqdan turistlərin gəlməsi İraqdan Azərbaycana birbaşa aviareysin olması ilə izah edilir.
Assosiasiya rəsmisi qeyd edib ki, bu il Azərbaycana Oman, Qətər, Bəhreyn, Səudiyyə Ərəbistanı, Birləşmiş Ərəb Əmirlikləri və Küveytdən də gələn turistlərin sayı çoxalıb: “Azərbaycana ərəb ölkələrindən gələn turistlərin sayının çoxalması Fars körfəzi ölkələri üçün sadələşdirilmiş viza rejiminin tətbiq olunması ilə əlaqədardır”.
M.Ağakərimov bildirib ki, ərəb turistlərin Azərbaycanda ən çox gəzdikləri məkanlar Bakı şəhəri, regionlardan isə Quba, Qusar, Qəbələ, İsmayıllı və Ağsudur.
Onun sözlərinə görə, ərəb turistlər Azərbaycanda çimərliklərə, əyləncəli proqramlara daha çox maraq göstərirlər: “Azərbaycanda həm Avropa, həm də Asiyanı birləşdirən amillər var ki, bu da ərəb turistləri maraqlandırır. Ölkəmizə gələn ərəblər daha çox Azərbaycanın görməli yerləri ilə tanış olmaq istəyirllər, Dənizkənarı Milli Parkı bəyənirlər. Turistlərin bir çoxu Azərbaycanın təbiətini, tarixi abidələrini, mətbəxini bəyənir. Ölkədəki sabitlik də ərəb turistləri Azərbaycana cəlb edən amillərdəndir. Apardığımız təhlillərə görə, ərəb turistlər nəinki yay, hətta qış aylarında da Azərbaycana üz tutacaqlar. Çünki ölkəmizdə qış turizmi üçün böyük şərait var”.
M.Ağakərimov qeyd edib ki, Azərbaycana gələn ərəb turistlər ölkəmizdə orta hesabla 1 həftəyə yaxın qalırlar: “Ərəb turistlər ekskursiyalardan da çox istifadə edirlər. Onlar daha çox tarixi yerlərə – Yanardağa, Atəşgaha, həm də regionlara ekskursiyalara gedirlər”.
AzTA sədrinin müşaviri həmçinin vurğulayıb ki, ərəb turistlər daha çox Qəbələ, Quba, Qusar və Şahdağda müxtəlif dərəcəli otellərdə qalırlar: “Onların bir qismi 5, bir qismi isə 2-3 ulduzlu otellərdə qalır. Əsasən BƏƏ-dən, Küveytdən gələn turistlər 5 ulduzlu otelləri seçirlər”.



Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir